പ്രിയ മക്കളെ, ഞാൻ നിങ്ങൾക്കു കാണിച്ചു തന്ന പാതയിലൂടെ മുന്നോട്ടു പോകുക. നിങ്ങൾ മറക്കരുത്: എല്ലാ കാര്യത്തിലും, ദൈവത്തിനാകണം പ്രഥമസ്ഥാനം. എന്റെ പുത്രനായ ഈശോയിൽ നിന്നും നിങ്ങളെ അകറ്റാൻ ലോകകാര്യങ്ങളെ നിങ്ങൾ അനുവദിക്കരുത്. നിങ്ങൾ എപ്പോഴും ദൈവത്തിന്റെ നിധികൾ തേടുക. ഈശോയിൽ മാത്രമേ നിങ്ങൾക്ക് പൂർണ്ണ സന്തോഷം കണ്ടെത്താൻ കഴിയുകയുള്ളൂ. ഞാൻ സ്വർഗ്ഗത്തിൽ നിന്നും വന്നത് നിങ്ങളെ സ്വർഗ്ഗത്തിലേക്ക് കൊണ്ടുപോകാനാണ്. നിങ്ങൾ നിങ്ങളുടെ കരങ്ങൾ എനിക്കു തരിക, ഞാൻ നിങ്ങളെ വിശുദ്ധിയുടെ പാതയിലൂടെ നയിക്കാം. നിങ്ങളെ സ്നേഹിക്കുകയും, പേരിനാൽ നിങ്ങളെ അറിയുകയും ചെയ്യുന്നവന്റെ അടുത്തേക്ക്, മാനസാന്തരത്തോടെ, നിങ്ങൾ മടങ്ങുക. നിങ്ങളുടെ പ്രതിസന്ധികൾക്കിടയിലും നിങ്ങൾ പിൻവാങ്ങരുത്. പരീക്ഷണങ്ങളുടെ ഭാരം നിങ്ങൾക്കനുഭവപ്പെടുമ്പോൾ, നിങ്ങൾ ഈശോയെ വിളിക്കുക. നിങ്ങളുടെ പേരുകൾ സ്വർഗ്ഗത്തിൽ എഴുതപ്പെട്ടിരിക്കുന്നു എന്നതിൽ നിങ്ങൾ സന്തോഷിക്കുവിൻ. കർത്താവ് നീതിമാൻമാർക്കായി കരുതി വെച്ചവ, മനുഷ്യ നേത്രങ്ങൾ ഇതുവരെ കണ്ടിട്ടില്ല. നിങ്ങൾക്ക് ഇനിയും വർഷങ്ങളോളം കഠിനമായ പരീക്ഷണങ്ങൾ ഉണ്ടാകും, എന്നാൽ അവസാനം വരെ വിശ്വസ്തരായി തുടരുന്നവർക്ക് കർത്താവിൽ നിന്ന് വലിയ പ്രതിഫലം ലഭിക്കും. പ്രാർത്ഥനയിൽ നിന്നും നിങ്ങൾ പിന്തിരിയരുത്, പ്രാർത്ഥനയിലൂടെ മാത്രമേ നിങ്ങൾക്ക് എന്റെ അപേക്ഷകൾ മനസ്സിലാക്കാൻ കഴിയുകയുള്ളൂ. ഇന്നേ ദിവസം പരമപരിശുദ്ധ ത്രിത്വത്തിന്റെ നാമത്തിൽ ഞാൻ നിങ്ങൾക്ക് അയക്കുന്ന (നൽകുന്ന) സന്ദേശം ഇതാണ്. ഒരിക്കൽ കൂടി നിങ്ങളോടൊത്ത് ചേരാൻ എന്നെ അനുവദിച്ചതിനു നന്ദി. പിതാവിന്റെയും പുത്രന്റെയും പരിശുദ്ധാത്മാവിന്റെയും നാമത്തിൽ ഞാൻ നിങ്ങളെ ആശീർവ്വദിക്കുന്നു. ആമേൻ. സമാധാനത്തിൽ ആയിരിക്കുക.
