പ്രിയ മക്കളെ, നിങ്ങൾ സൗമ്യതയും എളിമയും ഉള്ളവരാകുവിൻ. എളിമ കൂടാതെ നിങ്ങൾക്ക് സ്വർഗത്തിൽ എത്താൻ കഴിയുകയില്ലെന്ന് എന്റെ ഈശോ തന്റെ മാതൃകയാലും വാക്കുകളാലും നിങ്ങളെ പഠിപ്പിച്ചു. പ്രാർത്ഥിക്കുന്ന പുരുഷന്മാരും സ്ത്രീകളുമാകാൻ ഞാൻ നിങ്ങളോട് ആവശ്യപ്പെടുകയാണ്, എന്തെന്നാൽ ഈ വിധത്തിൽ മാത്രമേ നിങ്ങളുടെ ജീവിതത്തിനായുള്ള ദൈവീക പദ്ധതികൾ നിങ്ങൾക്ക് മനസ്സിലാക്കാൻ കഴിയുകയുള്ളൂ. ഞാൻ വിളിക്കുമ്പോൾ നിങ്ങൾ നിങ്ങളുടെ ഹൃദയങ്ങൾ തുറക്കുക. ഞാൻ സ്വർഗ്ഗത്തിൽ നിന്നും വന്നത് നിങ്ങളെ സ്വർഗ്ഗത്തിലേക്ക് കൊണ്ടുപോകാനാണ്. നിങ്ങൾ പിന്തിരിയരുത്. ലോകത്തിലെ കാര്യങ്ങൾ നിങ്ങളെ മലിനപ്പെടുത്താൻ നിങ്ങൾ അനുവദിക്കരുത്. നിങ്ങൾ കർത്താവിന്റേതാണ്, നിങ്ങൾ അനുഗമിക്കുകയും, ശുശ്രൂഷിക്കുകയും ചെയ്യേണ്ടത് അവിടുത്തെ മാത്രമാകുന്നു. നിങ്ങൾ എൻ്റെ ഈശോയുടെ സുവിശേഷം സ്വീകരിക്കുകയും, അവിടുത്തെ സഭയുടെ യഥാർത്ഥ പ്രബോധനത്തിൻ്റെ പഠനങ്ങളോട് വിശ്വസ്തരായിരിക്കുകയും ചെയ്യുവിൻ. നിങ്ങൾ എപ്പോഴും ഓർക്കുക: ഈ ജീവിതത്തിലാണ് നിങ്ങളുടെ വിശ്വാസത്തിന് നിങ്ങൾ സാക്ഷ്യം വഹിക്കേണ്ടത്. നിങ്ങൾ ശ്രദ്ധാലുവായിരിക്കുക. സത്യത്തിൽ നിന്നും നിങ്ങളെ അകറ്റാൻ പിശാച് പ്രവർത്തിക്കുന്നതാണ്. തെറ്റായ പഠനങ്ങളിലൂടെ പലരും മലിനമാക്കപ്പെടും. നിങ്ങൾ നിങ്ങളുടെ കരങ്ങൾ എനിക്കു തരിക, നിങ്ങളെ സ്നേഹിക്കുകയും, നിങ്ങളുടെ പേര് അറിയുകയും ചെയ്യുന്നവനിലേക്ക് ഞാൻ നിങ്ങളെ നയിക്കാം. നിങ്ങൾക്ക് സ്വാതന്ത്ര്യമുണ്ട്, എങ്കിലും ഏറ്റവും നല്ലത് ദൈവഹിതം നിറവേറ്റുക എന്നതാണ്. സ്നേഹത്തിലും, സത്യത്തിന്റെ പ്രതിരോധത്തിലും മുന്നേറുക. ഇന്നേ ദിവസം പരമപരിശുദ്ധ ത്രിത്വത്തിന്റെ നാമത്തിൽ ഞാൻ നിങ്ങൾക്ക് അയക്കുന്ന (നൽകുന്ന) സന്ദേശം ഇതാണ്. ഒരിക്കൽ കൂടി നിങ്ങളോടൊത്ത് ചേരാൻ എന്നെ അനുവദിച്ചതിനു നന്ദി. പിതാവിന്റെയും പുത്രന്റെയും പരിശുദ്ധാത്മാവിന്റെയും നാമത്തിൽ ഞാൻ നിങ്ങളെ ആശീർവ്വദിക്കുന്നു. ആമേൻ. സമാധാനത്തിൽ ആയിരിക്കുക.
